الأربعاء، يونيو 12، 2013

امتحان

-1-
ليلة الامتحان زمان كان ليها طقوس وهيبة
كنت بحاول أكون خلصت مذاكرة المادة للمرة التانية ع الأقل
كنت ببقى قلقانة
صحيح ساعات كنت بقعد اتفرج على التليفزيون
بس ساعتها كنت بعمل كده من باب الراحة
كنت بحاول أدخل أنام من بدري
وأفضل ساعات في السرير بتقلب
لحد ما أنام من كتر الخوف إني أصحى متأخر!

-2-
النهاردة ليلة الامتحان
الكتاب ماتفتحش بمعنى الكلمة وبدون مبالغة
ماحضرتش غير يجي تلت محاضرات
معرفش أي حاجة عن المنهج
ورغم كل ده مش قلقانة
وكمان مش فارق معايا
الامتحان معادش الفزاعة اللى ممكن تخوفني
النجاح فى حد ذاته مش هدف!
و الامتحان ده مش نهاية الكون!
وساعات أفكر إنى ماأروحش
بس السبب الوحيد اللى يخلينى أقعد تانى قدام ورقة امتحان
إن كل ده من اختياري
ولازم أدعم اختياراتي،حتى لومش مستعدة!
حتى لو فقدت الحماسة!
حتى لو فكرت إن كل دى تفاهة!
لأن قدام الامتحان اليومي الكبير
اللى بدايته كانت يوم ميلادي
ونهايته لسه طي الغيب!
كل ده تفاهة!
ولسه مش مستعدة للامتحان!


ليست هناك تعليقات: