الأحد، يوليو 13، 2008

التاج!

وصلنى التاج ده من عزيزتى شيماء ( نبضة قلب) .... هو تدبيسة الحقيقة.... لأنى مش بحب أتكلم عن نفسى قوى....
هحاول أتكلم عن نفسى زى ما أنا شايفاها...مع ان ده صعب جدا...
1- انسانة مصرية .. كنت فاكرة انى مش بفكر... و اكتشفت انى بفكر أكتر من اللازم .. لدرجة مرهقة جدا الحقيقة .. ممكن ده بيخلينى صعبة الفهم احيانا
2- رغم انى اجتماعية جدا... الا انى بحافظ على المسافة بينى و بين الناس.. و ممكن افضل على كده سنين ..و ده بيخلينى أخسر ناس كتير حتى قبل ما أكسبهم... بس الحقيقة ان علاقتى بالناس طبقية الى حد ما... يعنى لازم كل فرد يمر بمراحل معينة فى تقسيمى و الترقيات صعبة جدا... كنوع من الحماية من الصدمات.
3- صريحة جدا...
4- رغم انى ممكن اتنازل عن حاجات كتير .. لكن الاكيد انى مش ممكن اتنازل عن مبدا بسهولة ...و لو حصل بحاسب نفسى حساب عسير جدا.
5- بحب كل الناس حتى لو كان لى تحفظات على حاجات فى شخصيتهم و حتى لو كان لى معاهم تجارب او مواقف سيئة..
6-سعيدة طول ما كل الناس اللى حوالى فى سعادة... أكتئب وحدى... أكتئب أكثر لما بحس بالوحدة و كل الناس حواليا.
7- قانعة بما قسمه الله لى ... طامحة فى اللامالانهاية.
8-ليس من السهل او اليسير احباطى ... لكن هذا يحدث عندما اتخوف من شئ ما و يتحقق.... و لذلك أحيانا أبدو كصائدة للأخطاء.
9-أؤمن بأن لى دورا فى هذه الحياة ... أبحث عنه ... أحاول الاقتراب ... حتى لا أخرج من الدنيا بصحيفة أعمال خاوية سوى من بعض الترهات.
10- بحب الحياة... حتى و ان قست ... بخرج من الحزن او الاكتئاب بسهولة جدا.. بمجرد انى اسمع الكروان .. او انى اشوف عصافير ..او زرع اخضر... او اكيد الدنيا تشتى.

بس خلاص
أمرر التاج لمييييييين؟؟؟
ل H2W كنــــــاريا

هناك 4 تعليقات:

Unknown يقول...

رغم انى اجتماعية جدا... الا انى بحافظ على المسافة بينى و بين الناس.. و ممكن افضل على كده سنين ..و ده بيخلينى أخسر ناس كتير حتى قبل ما أكسبهم... بس الحقيقة ان علاقتى بالناس طبقية الى حد ما... يعنى لازم كل فرد يمر بمراحل معينة فى تقسيمى و الترقيات صعبة جدا... كنوع من الحماية من الصدمات.@

وانا في انه مرحله دلوقتي :P

عجبني اوي النقطه ده لانه ده الصح فعلا

0- بحب الحياة... حتى و ان قست ... بخرج من الحزن او الاكتئاب بسهولة جدا.. بمجرد انى اسمع الكروان .. او انى اشوف عصافير ..او زرع اخضر... او اكيد الدنيا تشتى.@

وانا بحب النقطه فيكي ده بحس انك ممكن تعملي جو جميل من حاجات بسيطه ماشاء الله ربنا يبارك فيكي يارب

اقولك انا رايي بقى :P

بجد ياداليا ماشاء الله بحسك من الشخصيات المميزه اوي اللي انا ممكن اقابلها ليكي تفكيرك الخاص وارائك الخاصه المستقله اللي انا بستمتع جدا لما بقرأهالك في شكل مقالات

بجد سعيده جدا انه اتعرفت عليكي :)

ربنا يبارك فيكي ويحققلك احلامك يارب

Rehab يقول...

shimaa
منورة يا قمر
انتى و هبة و نهلة فى مكان محدش وصله قبل كده!
بحسكم اخواتى الكبار ..اللى لو احتجت اى حد فيكم فى اى وقت هلاقيها جانبى!
مرسى على مجاملتك الرقيقة..
صدقينى انا الاسعد انى اتعرفت عليكى :)

HaNoDa يقول...

كلامك جميل اوي يا داليا ..

انا فعلا بحسك بعيده عن الناس وانتي في وسطهم ...واحلي حاجه الارداه اللي عندك ...

وميرسي علي التاج ...تدبيسه تمام ...

وابقي نورينا بقي عشان تشوفي الرد ...

Rehab يقول...

هنودة
نورتى يا جميل
معاكى حق
و ايه رايك فى التدبيسة:p
عموما هزوركم قريب !