الخميس، يناير 31، 2013

مش تمام!

أيوه أنا مش تمام
ليه العجب؟
ده كل العجب إنى أكون تمام!
وهو ايه حوالينا تمام؟
ومن امتى أصلًا كانت حياتنا تمام؟
والأهم :ايه هو التمام؟

انا مش تمام
وأنا حاسة انى بعيش فى تلات دول
واحدة فيها الناس ميقاش فارق معاها أى حاجة
وتانية بتصرخ فى الهوا 
وتالتة بتتحدى كل اللى يخالف!
لا..الحقيقة انهم أكتر من كده
عندنا ييجى تمانين مليون دولة كل واحد عايش فيها على كيفه وخلاص
ومن كام أسبوع كان لسه عندى أمل الحال يتصلح
بس ازاى ينصلح واحنا كل واحد مننا فى حال!


أنا مش تمام
ولى اتنين أقرب من اقرب صديق
هما كتابى والسرير
بيتكلموا معايا ويسمعوا لى فى أى وقت 
وكتير بيحضونونى
وأكتر بيطبطبوا علىّ 
بس المشكلة انمحدش مدعم لجوئى أو تحديدًا هروبى إليهم!


أنا مش تمام
ومش هعيب ع الزمن اللى احنا فيه
ومش هلوم من البشر 
ومش هدور على شماعات
مع إن الأسهل :إنى أعلق شماعات!
بس الحقيقة انى مبقتش عارفة أى حاجة
ولا حتى فاهمة أى حاجة
ومبقاش فى عندى أى قدرة على الاندهاش!

التمام هو النظام السارى فى الملكوت
الشمس لما كل يوم تشرق تنور 
تثبت إعجاز الإله 
وما تلاقى حدًا من عباده يقول :يا ريت يومى يكون فى ربع إشراقك
لأن أغلبهم بيفوتوا على نفسهم لحظات جميلة معجزة عشان نيامى فى البيوت!
وأنا منهم!
لا ده انا قبلهم!

هناك 3 تعليقات:

Lobna Ahmed يقول...

حبيتها :)

شاب فقرى يقول...

عزيزتي

سؤال واحد بس

وهوا فى الحياة حد أصلا تمام ؟؟؟

الزمن مبناخدش بالنا منه لأننا بنتشغل بالحياة ومشاغلها وبأمور تافهة بنعتبرها الأهم

لكن الصراحة

الحماقة فينا إحنا اللى بنضيع لحظات ومناسبات ومواعيد وأشياء فى الكون مينفعش تتعوض

أتمني أن يسامحنا الله لأننا لم نتقبل أنفسنا وإنشغلنا عن الله وعن روعة خلقه سواء فى الكون أو فى أنفسنا وفى أنفس اللى حوالينا

بس خلاص كدا

تقريبا الكومنت خلص

إلي الكومنت القادم والزيارة القادمة

كوني بخير

شاب فقري

حبات التوت يقول...

وانا برضة مش تمام :(