الخميس، يوليو 15، 2010

::مع الكتب::

-1-
يدخل..يطلب ما يريد وبينما أحاسبه يلمح كتاب الأمير على المكتب..
-الأمير..مكيافيللى؟.. بتاع الغاية تبرر الوسيلة..خلى بالك على دماغك بقى :D
أبتسم و يمضى.

-2-
بينما المساعد يتم أعماله يغمغم..
-هسأل حضرتك على حاجة ..هو كتاب "آخر يهود اسكندرية" ده زى رأفت الهجان و الحاجات دى؟
-لأ...ده بيحكى عن حكاية تانية خالص!
-يعنى مش زى رأفت الهجان ؟
-لأ ده بيحكى عن آخر يهودى فى مصر :D

-3-
يمر أمام الصيدلية فى طريقه للمسجد لصلاة الظهر..هو بواب العمارة التى بها الصيدلية..يلمحنى جالسة على المكتب أسوى شيئا ما..يشاور عقله ..ويدخل..
-السلام عليكم
-وعليكم السلام و رحمة الله و بركاته
-بما انى شايف حضرتك بتحبى القراية فهجيب لك كتاب تقريه ..هيعجبك قوى..بس ترجعيهولى على طول عشان كان فى واحد اخده و كان عايز يضرب عليه.
- مفيش مشكله حضرتك هاته و تانى يوم باذن الله هرجعهولك.
-هصلى الضهر و أجيبه..
مر على فى اليوم التالى ..
-استنيت حضرتك امبارح بالكتاب بس غالبا نسيت!
-بصى هو كتاب قيم و غالى..
أنظر الى اللحية و أغمغم..هو اسمه ايه؟
يخرج من جيب جلبابه كتاب صغير بعنوان"أجمل ما فى الكون معرفة الله..قل مع الكون لا اله الا الله"
-اقرى حضرتك العنوان كده..
-أقرأه بصوت عال..وآخذه منه وأقول..بكرة باذن الله هرجعهولك.
-هو كتب قيم هيعجبك قوى ويا ريت تقريه فى هدوئ و سكينة و تعملى باللى فيه..وهو بدل الحاجات اللى ممكن تكون مُضلَة اللى بتقريها دى!
أبتسم و قد فهمت المغزى و لا أعرف أيها يقصد! :D
-ربنا يجازيك عنى خير.



هناك 3 تعليقات:

Amr Essam يقول...

مهما أخذتني دنياي بعيداً بهمومها (الكثيرة) وأفراحها (القليلة) فإنني أعود دائماً إلى عالمكِ الرقيق والذى أشعر دائماً به كنسمه رقيقة وسط صيف مشتعل ..دائماً ما تدهشنى كلماتكِ بعفويتها وتلقائيتها المحببة .. سعيد بقراءة كلماتكِ سيدتي .. تقبلي مروري!

Amr Essam يقول...

ممكن تسمحيلى بتصحيح بسيط لرباعية جاهين؟

سمعت نقطة مية جوه المحيط
بتقول لنقطة.. متنزليش في الغويط
أخاف عليكي من الغرق... قلت انا
ده اللي يخاف من الوعد.. يبقي عبيط!

Rehab يقول...

Amr Essam
أشكرك على اطراءك سيدى..اذن فلندعو الله ان يزيح عنك الهموم..أشكرك على تنبيهى للخطأ فى رباعية جاهين..عدلتها..دمت دوما متابعا لكلماتى..
تحياتى