الجمعة، سبتمبر 04، 2009

::سبع صنايع ..و البخت ضايع::



بما انى بدأت حياتى العملية فى صيدلية..اسمحولى أعرفكم بمهنتنا الموقرة بعد شهر تقريبا من المزاولة...الحقيقة الصيدلى مش زى ما الناس فاهمة ومش زى ما ناس كتير بتحب تسميهم " البقالين"...وده لمجرد انهم شايفين انه بيصرف الدوا المكتوب قدامه وبس..و ان الحكاية مجرد علب بتيجى من ع الرفوف..و لو الحكاية بالسهولة دى ما كنا عملنا صيدلية ماركت:D:..وكانت تبقى كل وظيفة الصيدلى انه يتابع التاس وهى بتشترى و يتمم ان كل واحد واخد اللى المفروض ياخده...مش هنكر ان تجارة الادوية..من مثلث الخطر بتاع التلات تجارات الأكثر شيوعا على مستوى العالم و هم " المخدرات ..السلاح .و الأدوية"...أرجع و اقول و أأكد وأصر على ان المهنة مش زى ما الناس فاكرة..و الا مكانش حديثى التخرج زى حالاتى لقوا صعوبة فى الشغل فى اول فترة...شوفوا معايا كده الصيدلى واللى اقصده هنا بالصيدلى اللى هو الصيدلة التانى اللى هو مش صاحب صيدلية بيعمل ايه:-
1-خبير حطوط:بيحاول يفك طلاسم الكلمات اللى بيكتبها الدكاترة وممكن يكون عارف كل الادوية اللى فى الروشتة بس مش عارف يصرفها لانه مش عارف يقراها..والحقيقة بعض الناس بيسهلوا الحكاية دى بانهم بيكونوا سألين الدكتور عن أسماء الدوية اللى كاتبها..و المفروض اننا ما نمارسش خبرة الخطوط لأن المفروض ان الروشتى تكون مطبوعة..زى روشتة كانت جاية من السعودية شفتها..و لكن لا حياة لمن تنادى.

2-مخزنجى: أقصد عامل فى مخزن..المفروض يتابع كميات كل صنف من الادوية و لو حاجة بدأت تخلص يكتبها ..ده غير طبعا جرد العلب المنتهية الصلاحية او الموشكة على الانتهاء..و أحيانا وجود الكومبيوتر فى الصيدلية بيوفر المجهود فى ده ..بس لو الكميات مضبوطة فعلا..ومع تجربتى السابقة فى العمل فى صيدلية مفيهاش كمبيوتر فأنا بفضل ده..عشان أبص ع الرفوف:..و طبعا استلام الطلبيات و مراجعتها وكده.

3-محاسب:-ومحاسب شاطر كمان و سريع عشان يقدر يلاحق على كل الطلبات و كمان يرضى كل الأطراف..أسوأ ما فى الجزء ده من الوظيفة..موضوع الخصم..بكرهه..ليه نعمل خصم اساسا..و لو هنعمل يا للناس كلها يا بلاش..و غير ده و ده..نسبة الخصم..على كل دوا غير التانى..على حسب نسبة الحصم اللى بتيجى عليه أصلا..لضمان المكسب.. و طبعا حسابات استلام الودية و تسليمها..أسخف ما يكون!

4-طبيب نفسى:- يفهم كل واحد جاى الصيدلية ليه..هم أكيد كلهم بيشتركوا فى سبب رئيسى وهو شراء العلاج..بس فى منهم بيبقوا عايزين اكتر من كده..بيبقوا كتير عايزين حد يسمعهم ..حد يحكوا معاه..حد يهون عليهم كل اللى بيتعرضوا له..أذكر فى الصيدلية الأولى جالى رجل مسن...قعد ..و قالى انه جه امبارح للدكتور و فى دوا مكانش موجود وهو محتاجه...قلت له طيب حضرتك قولى ايه هو و هشوف اذا كان جه و لا لأ؟...المهم أدانى ورقة فيها حوالى 8 أنواع مختلفة..و قال لى تلاتة منهم مكانوش موجودين..بس مش فاكر انهى..المهم طلعت له علبة من كل نوع موجود عشان اوصل للى كان ناقص..وانا بعمل كده سالنى عن تليفون الصيدلية..لانه كان عايز يسال عليهم جم و لا لأ بدل ما يجى المشوار..اديته النمرة ..ووريته العلب و قلت له انهى منها ناقص يا حاج..قال لى على اللى عنده..و بعدين قالى خلاص هاتيهم كلهم..وعرفت ايه اللى مكانش موجود و كان لسه مجاش..قال لى خلاص هاتى الموجود و الباقى ابقى ابعتيه ع البيت..قلت له تحت أمرك..بس حضرتك غالبا أخدت الانواع دى امبارح و لسه الناقص مجاش..طلب مايه..و بعد ماشرب سالنى تانى على التليفون و قلت له انا اديتهولك يا حاج عشان لو عايز تسال على اى حاجة فى وقت نبقى تحت امرك وحتى كمان عشان متتعبش نفسك و تنزل فى الحر الفظيع ده..رجع طلب منى الدوا..قلت له انه لسه مجاش..قالى ما انتى لسه مطلعاه..قلت له..حضرتك ده نفس اللى أحدته امبارح اللى ناقص لسه مجاش..و حتى معاد وصول الطلبية عدى..قالى و انا ذنبى ايه؟؟..اخد الدوا ازاى دلوقتى..انا عايز اكل..عشان اخد الدوا..انتم صيدلية مش محترمة ومش هتعامل معاكم تانى..لو انتم صيدلية كويسة كنتم جبتم الدوا.دى ارواح ناس مش لعبة...قلت له حضرتك التقصير مش من عندنا احنا طلبنا الدوا اللى حضرتك عاوزه وهو لسه مجاش الشركة اتاخرت..حضرتك ادينى اسمك و العنوان و انا اول ما يوصل هنوصله لحضرتك على طول..المهم وصلت عربية شركة بتوصل دوا..قلت له انا حالا هاتكلم معاهم فى ان دى مش مواعيد وان ارواح الناس بتتوقف على كده..و لكن الطلبية دى مكانتش من الشركة المتأخرة..و سالنى اذا كنا بنحلل سكر فى الصيدلية ..قلت له اه..هو حضرتك عندك سكر..قال لى لا بس عايز اطمن..قلت له ع الاعراض و مكانتش عنده..وهو مصمم يعمل التحليل و بعدين افتكر الدوا و رجع تانى يعيد نفس الكلام.. و قلت له خلاص روخ حضرتك و انا هبعت لك الدوا كامل لحد البيت..قال لا انا هاخد اللى انتى نزلتيهم دول دلوقتى..هو انا حرامى ما انا هدفع فلوسهم قلت له لا خالص الفكرة ان حضرتك ماتبقاش متلخبط ايه جه و ايه لسه..وطبعا افتكر الدوا اللى ناقص قلت خلاص انا هريحه ..كلمت صيدلية تانية و طلبت منها الدوا و بعت الدليفرى يجيبه..قالى هيتأخر..قلت له لا..المهم وهو قاعد مستنى بقى ..حكى لى قصة حياته..و انه عايش لوحده و ان مراته الاولانية ماتت و هو كان دايما بياخدها معاه عمرات و كانت بتفهمه من قبل حتى ما يتكلم...اما التانية فاسبته لوحدهو راحت كفر الزيات..الحقيقة صعب على..و عرفت هو ليه كان بيتعامل معايا كده..و بعد ما خرج الشجنة اللى عنده..قالى خلاص ابقى ابعتيه البيت و يدوبك و هو طالع وصل الدوا و اخده معاه ..الحكاية دى اخدت حوالى ساعة الا ربع..و خلالها كمان كنت بجيب دوا ناس تانية..الحقيقة هو مكانش عايز الدوا اد ماكان عايز حد يتكلم معاه..وانا مفهمتش ده غير فى الآخر!

5-صيدلى..يجي حد يشتكى من حاجة معينة و نسأله شوية أسئلة و نطلع له أحسن دوا ممكن يعالج حالته..مش بس كده و لا يتوائم كمان مع ظروفه الاقتصادية..وده مش شئ سهل..و محتاج معرفة كل الاصناف الموجودة غير معرفة اسعارها و طبعا هى بتعالج ايه..و مناسبة لمين!

6-خبير فى مستحضرات التجميل..و ده طبعا شئ مزعج..رغم كونى بنت و عندى معلومات لا باس بها..لكن أكيد مش هجرب كل أنوا الشامبوهات و الكريمات و خلافه..مش بس كده لا و أفهم كمان فى ماكينات الحلاقة.. وكريمات الحلاقة..و معجون السنان!..صحيح فى مقررات بتدرس مخصوص فى مستحضرات التجميل..بس أكيد مش بالشكل ده!

7- جليس أطفال..غالبا اللى بييجى يطلب الدوا أطفال أو مراهقيت بيبعتهم أهلهم يجيبوا الدوا..و طبعا بيبقوا مش مركزين ز مش عارفين هم عايزين ايه أصلا..و لازم يروحوا و ييجوا كذا مرة على ما نفهم ايه المطلوب..غير طبعا الأطفال مرتادى الصيدلية على سبيل اللهو..و ساعات بنلعب معاهم و ساعات بنمشيهم..و طبعا الاسيستنت اللى ممكن يكونوا زى الأطفال بالضبط!

ده نموذج سريع كده للى بيعمله الصيدلى..و الحقيقة أسوأ ما فى الموضوع ساعات الملل..جربت أتفرج ع التليفزيون كرهته و قللت منه خالص..لجأت للقراية..لقيتها بتحط حاجز بينى و بين اللى بيشتغلوا معايا..فبقيت بقعد و خلاص ..أفكر فى أى حاجة..و اللى يعيش يا ما يشوف!

هناك 6 تعليقات:

غير معرف يقول...

ياه يا داليا... فكرتيني بأيام الملل... بجد أنا كرهت المهنة بسبب الوقوف في الصيدلية... دي طلعت مهنة مملة قوي... الجزء الوحيد إللي حبيته في موضوع الصيدليات هو التعامل مع الناس والكلام مع المرضى... لأني من النوع المولع بالبشر... أما بقى الحسابات والجرد وقراية الروشتتات... فبكرهه كره العما... وبكره أي حاجة تتعلق بالفلوس... بتلغبط وبعك جامد جدا... وفعلا بعد أسبوعين من من مزاولة المهنة زهقت وقررت أقعد في البيت... وآخد مصروف من بابا حتى إشعار آخر...
:)
إستمتعت جدا بالمقال... وربنا يصبرك...

محمد قوزع...

NiceMind يقول...

يعيني ياداليا
ههههههههههههههههه
انا قلت برده ياجدعان انا ماليش في مووضع الصيدليه ده خااااااااااااالص
بس اهه تجربه واكيد حتطلعي منها بحاجات كتير
بس برده
ربنا يقويكي

Rehab يقول...

محمد
كلنا كده..الحقيقة انا بشتغل و باخد مصروفى برده حتى اشعار آخر..مهو مش ينفع ان الواقع مايعجبناش فنسيبه و خلاص..عن نفسى مش هسيب الشغل الا و انا احسن صيدلانية فى سنى أو لو جات لى فرصة تانية


سلمى
لا مهو كلنا عارفين كده:P
عن نفسنا يعنى:D
و لازم تجربى لاحظى انى بكتب من خلال تجربتى الشخصية اللى مش بالضرورة انها صح!
عايز اسمع فى يوم من الايام انك هتتدربى:D

دودّا هانم لماضة يقول...

ههههههههههههه
حلو اوى المقال يا داليا
اوحش ما ف الموضوع
ان الناس ديما بتحكم على الصيدلى انه بقال زى ما قولتى
مع انهم مايعرفوش حاجة م الى بنشوفه
او على الأحرى الى انتو بشوفوه باعتبارى لسة مش اتخرجت
يعنى الواحد يقضى خمس سنين ف الكليه _ على أقل تقدير _ وممكن طبعا يبقوا ستة
ومش بعيد يبقوا سبعه
وجايز اوى يبقوا تمانيه
ومحتمل يوصلو لتسعه :D

بس عارفه فعلا أصعب حاجة حكاية الى عاوز حد يسمعه
لأن انتى ف وقت هتكونى فيه مخنوقة وتعبانه ونفسك انتى الى تتكلمى وتشكى وتلاقى الى بيشتكى لك من حياته
بجد عجبنى اوى اوى ردود فعلك
مقال جميل اوى
والبلوج توحفة
اول مرة اقرالك حاجة
واكيد مش آخر مرة بإذن الله
سورى طولت عليكى :)

صانعة الأحلام يقول...

ربنا معاكي يا بنتي

Rehab يقول...

دودا لماضة: سعيدة بمرورك و عايزة أقول ان ممكن كلامي يكون فيه مبالغة واحتمال بعد شوية وقت تغيري رأيك صانعة الأحلام: دعواتك و كل عام و أنتي بخير