تلك اللحظة الباهرة عند عودتى متأخرة للمنزل و فيلمى المفضل فى نهايته و لا أشعر بأى ندم لأننى رصدت فرحة قلبين .

اسبرسو كون بانا

نظرت لقائمة المشروبات و طلبت من النادل فنجانًا منه، و حينما أحضره لها أدركت كم يبدو لذيذًا ، أخذها الطعم الحلو و الغني للكريمة إلى عالم كامل مثالى، لا تؤمن بوجوده لكنها تسعى جاهدة لايجاده ،و لم يفتها أنها فى حاجة ماسة لرشفة القهوة، تلك التى تتغلغل حواسها ،و توقظ بمرارتها كل سراديبها المغلقة ،لتصيرفى حالة وعى تامة و كاملة، لذلك خلطت الاثنين معًا، ليصبح المذاق مشابهًا تمامًا لما تشعر به، و بعد أن أنهت مشروبها أدركت "كم تشبهنا اختياراتنا"، و رشفت قليلًا من الماء البارد، و لم تكن يومًا أكثر رضا.

Simply Irresistable

مبدأيا أنا مش خبيرة تغذية و لا طباخة بريمو..يعنى ماتفتكروش انى "مها رادميس"..ولا حتى "مارثا ستيورات" ..زيى زىّ أماندا ..بطلة الفيلم اللى اقتبست منه العنوان ..أماندا كانت كل ما تحس احساس يتنقل للأكل، و كمان يتنقل للشخص اللى أكله ،لو هى سعيدة ،هيكون سعيد، لو هى حزينة ،الحزن هيتنقل له ،وهيكون مستمتع جدا وهو حاسس كده..نويت بعون الله أكتب عن فلسفتى فى  الطبخ..على هيئة مجموعة تدوينات 

و لأنى مصرية ،فالأكل جزء لا يتجزأ من شخصيتى ..

الأكل عندنا يعنى العيلة و اللمة ، يعنى المواسم ..الأفراح و الأحزان.

فكروا معايا كده..هتلاقوا مفيش مناسبة أو موسم الا و ليها أكل معين فى ثقافتنا المصرية الصميمة..

العيد الكبير..الفتة و اللحمة

العيد الصغير.. الكحك و البسكوت

شم النسيم..البيض الملون و الفسيخ و السردين
حتى عاشورا!

وتلاقى معظم الستات المصريات بيقضوا حياتهم فى المطبخ أو حواليه، بس لأن الدنيا بتتغير ..تلاقى بنات اليومين دول بيكرهوا المطبخ..وعندهم أسباب كتيـــــــر:-

*.. يمكن مفيش وقت يدخلوا المطبخ و يتعلموا

* مفيش وقت يطبقوا اللى اتعلموه

ودول أقول لهم الوقت موجود بس غالبا احنا بنستغله غلط..لأن أفضل تطبيق ل "Time Management"..هو المطبخ و شغل البيت 

* فى بقى مجموعة بتكره الطبخ و شغل البيت عموما لأنه ممل

والسبب ده بيخليهم ياما ياكلوا أى حاجة و خلاص،ياما يعتمدوا على حد تانى يقوم بالمهمة دى...والحل بسيط "أضف الى عملك ما يزيد استمتاعك به"..

حاجة تانية بقى..
فى ثقافتنا المغلوطة ..المطبخ مملكة المرأة و بس!!
و الرجل مش بيدخل المطبخ الا اذا كان مضطر...رغم ان أمهر طباخين العالم رجال!
ويمكن ده سبب يخلى الستات تكره الطبخ..لأن مفيش حد بيشاركها اهتمامها أو بمعنى أدق مسئوليتها..اللهم الا اذا تدخل و عدل حاجات فى طريقة طبخها لأنها مش ملائمة لذوقه..
احم احم..أنا مش بحرض الستات تعترض لا سمح الله ..بس ده شئ بيضايق فعلا..
و مشاركة الرجل للمرأة فى الطبخ أكيد هتفرق معاها كتيييييير..فى ناس ممكن تقول انى بعوم على موجة تغريبية منشأها ان الرجل الغربى أما يحب يبهر امراة تعجبه يطبخ لها!
بس " زى ما اعلان جلاكسى بيقول "الحياة تحلو معها المشاركة"
Life is about sharing


هسيبكوا مع الفيديو ده هو بيعرض مبادئ فى دخول المطبخ